Македонија рутински до убедлив триумф против Гибралтар (ВИДЕО)

Половина час ѝ требаше на Македонија попладнево за лесно и убедливо да го победи Гибралтар со 4-0 за да се врати на победничкиот колосек и колку толку да ги залечиме раните од дебаклот со Грузија во четвртокот, во овој последен четврти меч во јунскиот циклус во Лигата на нации.

Македонија можеше денеска во најмала рака да дојде до рекордна домашна победа, но откако во првата третина од мечот ги торпедиравме Гибралтарците, а промашивме уште низа шанси, македонските фудбалери не најдоа начин да постигнат уште некој гол во вториот дел во кој четворица нови играчи добија шанса да дебитираат, Енис Фазлагиќ, Бојан Димовски и Валон Етеми од почеток на вториот дел, а Томче Гроздановски во средина на второто полувреме, за вкупно осуммина играчи кои месецов запишаа први настапи, по Давид Бабунски (Бугарија), Дејан Илиев, Никола Серафимов и Тодор Тодоровски (Гибралтар на гости).

Аматерите од Гибралтар не беа достоен ривал, па откако Енис Барди погоди од слободен удар после само три минути игра, единствено прашање беше со колку голови Македонија ќе триумфира на мечот, а за половина час црвено-жолтите дадоа вкупно четири, а уште толку можеа да додадат, но шансите не ги реализираа во тоталната доминација на теренот.

Тоа што се очекуваше од Македонија дека ќе доминира и нема да има проблеми поради огромната разлика во квалитет се оствари, па после Барди за минута ипол од 13-та до 15 минута, Бојан Миовски даде два сефте гола во националниот дрес, првиот со глава по асистенција на Барди, а вториот со рутинска реализација после одбиена топка, за Дарко Чурлинов да стави печат во акцијата во која исто така рутински погоди после додавањето на Тодор Тодоровски во најефективните половина час на мечот.

А, Македонија можеше до врв да го наполни Гибралтар, зашто Миовски погоди пречка, Чурлинов имаше зицер кој не го реализира од три метри, гостинскиот голман спаси чист гол при удар на Барди од седум метри, Бобан Николов имаше два опасни шутеви кон гол – и сето тоа во тие пеколни 30 минути кога сѐ беше решено на мечот.

За Македонија ова е втора победа во овој јунски циклус и со седум бода завршува на второто место на табелата пред завршните два меча кон крајот на септември, со Грузија на 23 септември на гости и со Бугарија на 26 септември дома во оваа трета сезона во Лигата на нациите.

ПОВРЗАНИ НАПИСИПОВЕЌЕ ОД АВТОРОТ