Бранителот на титулата во француското фудбалско првенство Пари Сен Жермен го мина и тешкото гостување кај Лион победувајќи со минималните 1:0 во дербито на осмото коло во Лига 1.
Натпреварот беше решен многу брзо, во 5 минута на асистенција на Нејмар поентираше Лионел Меси и сѐ до крајот тоа остана конечниот резултат. Ова беше четвртиот погодок на Аргентинецот во првенството.
ПСЖ впиша седум победи со само едно реми, и тоа на домашен терен со Монако. ПСЖ е прв со 22 бодови, два повеќе од Марсеј, три од Лорион и четири од Ланс. Лион, пак, остана на 13 бодови и на шестото место, бод помалку од Монако.
Ланс, исто така, и натаму е непоразен, откако одигра 0:0 на гостувањето кај Нант кој е 15-ти со седум бодови.
Монако убедливо со 3:0 победи кај Ремс. Во 22 минута беше исклучен домашниот играч Локо, што сосема му даде друга насока на мечот, а Монако го скрши домаќинот во вториот дел. Во 47 минута водството го донесе Голевен, а домашното израмнување подоцна го поништи ВАР-от. Сѐ до самата завршница Монако го имаше несигурното водство, но во 87 минута погоди Минамино а во 90 Бен Једер за конечните 3:0. Монако со победата дојде до петтото место, а додека Ремс остана 17-ти со шест бодови.
Ајачо ја оствари првата победа сезонава, и тоа минимална од 1:0 на гости кај Брест, а стрелец беше Амума во 65 минута. Клубот од Корзика и натаму е последен но сега со четири бодови, еден помалку од ривалите со кои ќе се бори за опстанок, меѓу кои е и Брест кој е претпоследен.
Марсеј и Рен ги поделија бодовите со двата гола на домашен играч. Гостите поведоа во 25 минута со автоголот на Гуендузи, а истиот играч израмни во 52 минута. Марсеј така испушти голема можност бодовно да се израмни со водечкиот ПСЖ, а Рен сега е 8-ми со 12 бодови.
Анже со погодокот на Бенталеб во 43 минута го освои сите три бода на гостувањето кај Ница, и сега е 14-ти со 8 бодови на колку остана и Ница која има подобра гол-разлика.
Гостинска победа оствари но со 3:1 Троа кај Клермон. Домашните поведоа во 4 минута преку Гастиен, но пресвртот го направо Мама Балден со головите во 23 и 54 минута, а победата ја потврди Рипар во 83 минута. Троа е 10-та со 10 бодови, а Клермон остана исто така на 10 бодови, но сега падна на 11-то место.
