Алармантни се информациите коишто потекнуваат од допломатски извори за ново „национално предавство“ коешто го подготвуваат премиерот Зоран Заев и неговиот сопартиец и специјален претставник во разговорите со Софија, Владо Булковски, предупредува во четвртокот лидерот на опозициската ВМРО-ДПМНЕ, Христијан Мицкоски.
Бучковски во Софија, а Заев од Скопје, деновиве координираат тајни преговори каде се нуди Декларацијата усвоена од бугарскиот парламент да стане дел од преговарачката рамка со Европската унија, напиша во својот фејсбУк статус Мицкоски.
Притоа потсетува дека дел од документот на бугарското Собрание се оспорување на генезата и посебноста на македонскоит јазик, ревизија на историјата и периодот на нашата антифашистичка борба, како и присвојување на важни личности од македонската историја како бугарски и уште редица отстапки кои се погубни за Македонија.
„Заев се колнеше дека не прифаќа преговори за идентитетот и јазикот, а со прифаќањето бугарската Декларација да биде дел од преговарачката рамка на ЕУ, директно нѐ става во позиција да преговараме за македонскиот идентитет и јазик. Тоа е потег еднаков на предавство на македонскиот народ“, потсетува Мицкоски.
Наведува и дека неговите информации говорат дека сето тоа „дуото Заев-Бучковски планира да биде потпишано од нив, без да има расправа и усвојување на документот во Собранието на Македонија“.
„Ако Заев го прифати ова, тоа значи дека нѐ става во позиција да го негираме македонскиот идентитет и да прифатиме дека како народ постоиме од 1945 година, што е небулоза и срам за сите нас и за нашите предци и поколенија.
Не смееме да дозволиме овие двајца политички измамници да ја понижат жртвата на нашите предци и да ја загрозат иднината на нашите потомци. Затоа треба да бидеме подготвени за одбрана на македонскиот идентитет како составен дел од европските вредности, и да не дозволиме. Да бидеме подготвени за блокади и масовни протести! Нема преминување на црвените линии!
Не за уште еден национален пораз! Не во наше име и не за нашата Македонија!, пишува Мицкоски.
Во врска со тврдењето на премиерот дека „на рака“ му бил даден португалскиот предлог во однос на спорот Бугарија-Македонија, Мицкоски посочува дека „само политички аматер како Зоран Заев гради дебата околу предлог кој беше експресно одбиен од бугарската страна, што подразбира дека секој следен би бил драматично полош и поштетен предлог споредено со претходниот“.
