Премиерот Христијан Мицкоски изрази сочувство до семејствата чии членови загинаа во денешната несреќа во Нови Сад.
„Со длабока тага ја примив веста за трагичната несреќа во Нови Сад, која одзеде човечки животи и остави многу семејства во болка. Во овие тешки моменти, нашите мисли и молитви се со семејствата на загинатите и со сите повредени. Од името на Владата и од мое лично име, упатувам најискрено сочувство до семејствата на настраданите. Нека им биде лесна земјата на оние кои ги загубија своите животи, а на повредените им посакувам брзо и целосно закрепнување. Во овие моменти на тага, стоиме заедно со нашите соседи и пријатели од Србија. Нека оваа трагедија нѐ потсети на важноста од меѓусебна поддршка и солидарност“, објави во петокот вечерта Мицкоски на Facebook.
На железничката станица во Нови Сад во петокот во 11:50 часот се урна бетонската настрешница на зградата на станицата. Под настрешницата имало клупи и на нив во моментот на падот имало голем број граѓани.
Во Србија денеска е прогласен ден на жалост. Бројот на жртвите до петокот вечерта се искачи на 14, од кои седум се идентификувани меѓу кои и еден македонски државјанин.
