Не би сакал да коментирам други политички партии, бидејќи мислам дека тоа е нивна внатрешна и автентична работа. Се надевам дека набргу ќе ги надминат недоразбирањата кои ги имаат и дека ДУИ ќе биде политичка партија која ќе работи во интерес на граѓаните на Македонија а не за сопствен, личен и партиски интерес, изјави во неделата претседателот на ВМРО-ДПМНЕ одговарајќи на новинарско прашање.
Пред промоција на весникот на Унијата на младите сили на ВМРО-ДПМНЕ „Мегафон“, Мицкоски посочи дека она што е заеднички именител за спомнатите две владејачки партии во овој момент се лажењето, крадењето и лошите политики и дека на Македонија ѝ е неопходна нова влада.
„Се надевам дека овие случувања таму тие ќе излезат поспремни и поамбициозни да работат навистина за граѓаните на Македонија без разлика дали тие граѓани се од опозицијата или власта, или без разлика дали се партиски определени или не, дали се Македонци, Албанци, Турци, Срби, Власи, Роми, Бошњаци и останати, важно е во овие тешки времиња на граѓаните да им понудиме решенија за напластените проблемите, а такви ги има многу“, рече Мицкоски.
Посочи дека треба да се промени владата, парцијални промени во влада не се решение за проблемите.
– Колку побргу владата се промени и дојде нова влада која ќе го има народниот легитимитет, толку побргу на Македонија ќе и тргне, изјави Мицкоски.
