Директорката на фестивалот „Браќа Манаки“, Лабина Митевска по инцидентот со режисерот на филмот „До Балчак“, Столе Попов на црвениот килим испрати реакција до медиумите.Имено, пред започнувањето на фестивалот и непосредно пред пристигнувањето на големата актерска ѕвезда Жулиет Бинош, Митевска и Попов имаа вербална расправија на црвениот килим, по што режисерот демонстративно го напушти местото.
На денешната прес конференција, Попов ја обвини Митевска за несоодветен третман на фестивалот, а фестивалот „Браќа Манаки“ го нарече „селска приредба, одвратна и малограѓанска.“
„Како фестивал се трудиме достоинствено да ги пречекаме сите гости и тоа секогаш да биде на рамноправно ниво. Tоа се однесува oсобено на македонските премиери, на кои им посветуваме особено внимание и почит. Однесувањето на дел од филмската екипа на „До Балчак“ сметаме дека е недолична и неправедна кон нас. Не постои светски фестивал кој бил вака навредуван од гостите. Доколку имало какво било недоразбирање, требало прво да ни се обратат нам за да го решиме на лице место, а не во јавноста намерно да се шират дезинформации и искривена слика за околностите. Ние како фестивал никогаш не поддржуваме тенденциозно правење скандали и никогаш нема да поддржуваме.Во таа смисла, црвениот килим некому му се допаѓа, некому не, но се трудиме да наликуваме на големите светски фестивали и „Браќа Манаки“ го правиме по тој терк. Навистина ми е жал ако црвениот килим и можноста да го претстави своето уметничко дело некој овој пат го искористи за лична промоција. Фестивалската програма е така конципирана што секоја година го ставаме фокусот на една ѕвезда. На отворањето ја имавме Жулиет Бинош и двајцата Оскаровци-добитници на „Златна камера 300“. Вториот фестивалски ден беше насочен кон филмот До балчак. И во двата случаи се вложивме со сите расположливи капацитети и можности.Сите недоразбирања ги оставаме зад нас, она што е сега важно дека имаме еден мошне интересен филм, од добар автор, ние секогаш ќе ги поддржуваме квалитетните уметнички дела, затоа сме и тука.“
