Цените на нафтата се зголемија на меѓународните пазари во петокот до 73 долари, бидејќи ураганот Франсин речиси го преполови производството во американскиот Мексикански залив, засенувајќи ја загриженоста за побарувачката.
На лондонскиот пазар цената на барелот по пладне беше за 74 центи повисока од вчерашното затворање на тргувањето и изнесуваше 72,71 долар. На американскиот пазар со барелот се тргуваше по повисока цена од 1,02 долари, од 69,99 долари.
Одделно, Организацијата на земјите извознички на нафта (OPEC) објави дека барелoт од референтната нафтена кошница на нејзините членки во четвртокот поскапел за 1,58 долари на 72,42 долари.
На крајот од седмицата, трговците се фокусираа на затворањето на платформата во Мексиканскиот залив на САД поради ураганот Франсин. Во четвртокот, производителите ја проценуваа штетата и ја проверуваа безбедноста на платформите. Официјалните податоци покажуваат дека речиси 42 отсто од производството било затворено во четвртокот.
Аналитичарите на UBS проценуваат дека производството во Мексиканскиот залив во септември ќе се намали за 50.000 барели дневно. Аналитичарите на FGE, пак, пресметале дека ќе се намали за 60.000 барели дневно, на 1,69 милиони барели дневно.
Доколку прекините на производството се краткотрајни и ако (проверките покажат) дека штетата на платформата е минимална, цените би можеле да се вратат на нивоата пред ураганите поради прогнозите за побарувачката, пошува аналитичарот Јеап Џун Ронг во порака за Reuters испратена по електронска пошта.
И Организацијата на земјите извознички на нафта (OPEC) и Меѓународната агенција за енергија (IEA) ги намалија прогнозите за раст на побарувачката оваа седмица, наведувајќи ја посилната продажба на електрични возила. Сепак, тие се разликуваа во оценката за побарувачката во Кина, која според IEA би требало значително да ослабне. OPEC посочува дека светската економија сѐ уште е солидна, со лавовски дел од Кина.
Загриженоста за побарувачката и во Кина и во САД поради забавувањето на економската активност влијаеше на цените во последните неколку недели.
Во петокот цените, заедно со прекинот на производството во Мексиканскиот залив, беа поддржани од бранот купувања и послабиот американски долар, што ги фаворизира купувачите со други валути, забележува Reuters.
