НБРМ во соработка со Европскиот фонд за Југоисточна Европа објави брошура „Купување дом со станбен кредит“.
Според гувернерот на НБРМ Димитар Богов, информациите во брошурата треба да им помогнат на граѓаните при одлучување за земање кредит и на кои елементи да обратат внимание.
Каде е битно да се задлабочат, да не пропуштат нешто, каде има некои потенцијални ризици и каде има некои скриени трошоци. Секако тоа не е лесна задача ниту за оние коишто имаат економско, финансиско образование, а уште потешка задача е за граѓани коишто немаат такво образование односно се специјализирани во некоја друга струка, рече денеска на промоцијата на брошурата гувернерот Богов.
Износот на нефункционалните кредити кај станбените кредити е на најниско ниво од сите останати кредити, така што, според Богов, тоа не е главна водилка во издавање на брошурата.
Во последните две години бројот и износот на станбени кредити се зголемува, стапките на раст се доста високи и сметаме дека граѓаните треба да бидат свесни за ризиците. Секогаш има простор за подобрување на информираноста, изјави Богов.
Примероци од брошурата ќе бидат доставени во експозитурите на сите деловни банки од каде ќе им бидат достапни на граѓаните.
