Иранскиот претседател Ебрахим Раиси изјави дека воздушниот напад што му се припишува на Израел врз неговиот дипломатски комплекс во Сирија „нема да остане без одговор“.
Портпаролот на израелските одбранбени сили (ИДФ), Даниел Хагари, ниту го демантираше ниту го потврди воздушниот напад за време на интервјуто за Си-Ен-Ен. Сепак, израелскиот функционер рече дека зградата била „преправена“ како цивилна, но не била ниту конзулат или амбасада.
„Според нашите разузнавачки информации, ова не е конзулат и не е амбасада“, изјави Хагари за Си-Ен-Ен. „Повторувам, ова не е конзулат и не е амбасада. Ова е воена зграда на силите Кудс маскирани како цивилна зграда во Дамаск“.
По нападот, Вашингтон го извести Техеран дека „нема вмешаност“ или информации за нападот во Дамаск, објави Аксиос цитирајќи американски официјален претставник.
Во меѓувреме, Иран и Сирија го обвинија Израел дека стои зад нападот. Покрај тоа, Техеран рече дека ќе ги смета САД „одговорни“ поради нејзината поддршка на еврејската држава.
Според иранското Министерство за надворешни работи, седум функционери биле убиени во нападот, меѓу кои бил и главниот командант на Корпусот на гардата на Исламската револуција, Мохамед Реза Захеди, кој ги предводел силите Кудс во регионот на Сирија и Либан.
Според изјавите за „Њујорк тајмс“, цел на нападот бил „тајниот состанок“ што се одржувал меѓу високи ирански разузнавачки претставници од силите Кудс и палестинскиот исламски џихад (ПИЏ) за да разговараат за војната во Газа.
