Кумановци и жители на соседните села, пред сè на Табановце и на Романовце, се жалат дека извесен период немаат железнички превоз кон Скопје, а информацијата денеска ја потврдија од ЖРСМ Транспорт АД-Скопје од каде кусо информираа дека проблемот е поради недостиг на машиновозачи. Оттаму најавија решавање на проблемот од август годинава.
Од македонски железници во кусото соопштение информираат дека линијата Скопје – Табановце – Скопје е во прекин.
– Линијата Скопје – Табановце е во прекин од 23.06.2022 година поради недостиг на машиновозачи. Правиме напори линијата Скопје – Табановце – Скопје да се нормализира во август 2022 година, кусо информираа од ЖРСМ Транспорт АД – Скопје.
Кумановци и жителите на селата кои патуваат за Скопје укажуваат дека имаат и месечни билети и дека ќе бараат поврат на средствата. Тие бараат побрзо решавање на проблемот, бидејќи цената на дневниот билет и повратна карта со воз е поевтина од цената за превоз со автобус.