Престојниов викенд следуваат нови два натпревари за македонската одбојкарска репрезентација во рамките на Европската лига, овој пат против Данска.
Нашите најдобри одбојкари ќе имаат и климатизирана сала во СЦ „Борис Трајковски“, откако издржаа пеколно жешки услови на претходните мечеви со Израел.
„Решени се проблемите, салата ќе биде климатизирана. Ја повикуваме публиката во што е можно поголем број да дојде и да ги бодри одбојкарите“, изјави генералниот секретар на ОФМ, Зоран Карановиќ.
По двата триумфи со Израел, селекторот Жарко Ристоски има желба за идентични резултати и против Данска.
„Против Израел остваривме две убедливи победи. Освоивме шест бода кои значат многу и за изгледот на табелата, но и за зголемување на нашите мотиви. Сега не очекува двомеч со Данска, која ни е позната селекција. Лани ни земаа еден бод во Струмица, но овојпат ќе се потрудиме да стигнеме до максимални победи. Секако дека го респектираме противникот, но и не стравуваме“, истакна селекторот на нашиот одбојкарски национален тим.
