Новиот хорор-филм „Нема да бидеш сама“ (You won’t be alone) е дело на македонскиот режисер Горан Столевски. Овој филм, во кој поголемиот дел од дијалогот се одвива на македонски јазик, е сместен во Македонија во 19 век.
Приказната е за вештерка која ѝ се појавува на млада мајка во изолирана куќа. Вештерката е жедна за свежа крв, но мајката моли и успева да постигне договор со вештерката: ако вештерката се врати кога ќерка ѝ ќе наполни 16 години, ќе може да ја земе тогаш. Вештерката се согласува, но како знак за договорот му го сече јазикот на бебето и со тоа го онеспособува да зборува.
– Во живописно истоштениот свет на Столевски, натприродното е прифатен дел од животот. Да, тоа предизвикува страв и е демонизирано, но секогаш ќе слета во сцена, не наидува на голем шок, туку повеќе е како неизбежна воздишка. Доаѓа за сите нас – стои во рецензија на филмот на британски „Гардијан“.
Очајната мајка се крие со бебето во пештера за да биде безбедна. Детето расте и еден ден вештерката ја наоѓа и ја зема. Вештерката го прави детето бесмртно и му дава способност да го менува изгледот во други лица. Така започнува приказната за живот во телата на другите, пишува „Гардијан“.
– Столевски, во филм кој помалку изгледа како дебитантен, а повеќе како ремек-дело, наоѓа генијален начин да направи длабински набљудувања за полот, родот и битието – стои во рецензијата.
Во филмот игра меѓународна актерска екипа, меѓу кои шведската актерка Нуми Рапас, австралиската актерка Алис Енглерт, португалскиот актер Карлото Кота и нашата Сара Климоска.
– Со претходно искуство само со кратки филмови, Столевски работи на повисоко, посигурно ниво од повеќето со многу поголемо искуство. Како режисер, тој е еднакво воодушевен од деталите на природата и човечката интеракција, како и неговиот протагонист, одбирајќи ги интересните мали нешта и одеднаш правејќи ги да изгледаат многу поголеми, отворајќи го овој свет за сите нас.
– Како автор, тој е способен за извонреден увид и емпатија, прикажани најефективно во доцното откривање на ужасната приказна за јадачка на волци, жена уништена од машките очекувања и расудувања. Неговиот филм си игра со фантазија и ужасен телесен хорор – се прикажуваат многу искинати утроби – но тој на крајот создал нешто неопределено, и тоа на сјаен начин, како нешто што досега не сме виделе и веројатно нема да видиме повторно – пишува „Гардијан“.
„Нема да бидеш сама“ во моментов се прикажува на фестивалот „Санденс“, а ќе биде премиерно прикажан во кино на 1 април.
