Министерот за надворешни работи Бујар Османи на својот Фејсбук профил објави фотографии од вториот ден од средбите со бугарската министерка за надворешни работи Теодора Генчовска.
„Заедно со министерката Генчовска и експерските тимови на министерствата на Северна Македонија и Бугарија, денес продолжуваме со активностите и дијалогот за поплочување на заедничкиот пат на интеграцијата“, напиша Османи.
Бугарската делегација предводена од министерката за надворешни работи, Теодора Генчовска, денеска ја продолжува работната посета на СевернаМакедонија, а во тек е и нов состанок со шефот на македонската дипломатија, Бујар Османи, информираа од Министерството за надворешни работи.
Осуди за палењето на Културниот Центар во Битола, стигнаа и од македонска и од бугарска страна, а заеднички се нагласи дека станува збор за вандалски чин и се порача побрзо да се откријат сторителите.
Османи и Генчовска заеднички остро го осудија инцидентот во Битола и најавија дека двете министерства ќе продолжат да наоѓаат заемно прифатливи решенија и да ги унапредуваат билатерталните односи помеѓу двете земји.
