Американската софтверска компанија „Мајкрософт“ објави квартални деловни резултати кои ги надминаа очекувањата, но прогнозата за побавен раст на услугите во тековниот квартал, доведе до пад на цената на акцијата.
Продажбите на деловниот сегмент на Azure Cloud се очекува да пораснат за 31-32 проценти во тековниот квартал, по растот со стапка од околу 34 проценти во првиот фискален квартал (консензус 32,8 проценти; претходниот квартал 35 проценти). Менаџментот на компанијата објави дека не е реализиран дел од капацитетот во сегментот Data Center кој беше планиран да се насочи кон областа на вештачката интелигенција (AI), што ќе го забави растот на Azure во последниот квартал.
Поради ова забавување, компанијата очекува приходи во опсег од 68,1 до 69,1 милијарди долари во тековниот квартал, што одговара на просечен раст до 10,6 проценти. Пазарниот консензус очекуваше приход од 69,83 милијарди долари.
Оваа вест го засени прилично добриот квартален извештај на компанијата, кој објави пораст на приходите од 16,1 отсто на 65,6 милијарди долари, надминувајќи ја консензуалната проценка од 64,56 милијарди долари.
Деловниот сегмент на Intelligent Cloud забележа раст на приходите од 20 проценти до 24,1 милијарди долари (консензус 24,04 милијарди долари), предводен од претходно споменатиот раст во подсегментот Azure и други облак услуги. Компанијата соопшти дека 12 процентни поени од растот на Azure се припишуваат на вештачката интелигенција, што е процентен поен повеќе од претходниот квартал. Менаџментот на компанијата очекува дека бизнисот со вештачка интелигенција би можел да донесе годишен приход од повеќе од 10 милијарди долари некаде во следниот квартал.
Сегментот на продуктивност и деловни процеси забележа раст на приходите за 12 отсто до 28,3 милијарди долари (консензус 27,9 милијарди долари). Канцелариските комерцијални производи и облак услугите пораснаа со стапка од 13 отсто, а истите производи наменети за индивидуални потрошувачи пораснаа за пет отсто. Dynamics забележа раст на приходите од 14 проценти, а LinkedIn 10 проценти.
Сегментот на персонални компјутери забележа пораст на приходите за 17 отсто на 13,2 милијарди долари (консензус 12,56 милијарди долари), но 15 процентни поени раст дојде од консолидацијата на резултатите по купувањето на Activision. Windows OEM и хардверот имаа стапка на раст од два отсто, додека содржината и услугите на Xbox скокнаа за 61 отсто. Приходите од пребарувањето и рекламирањето се забрзаа за 18 проценти во кварталот (19 проценти без валутни ефекти), што е директен резултат на влијанието на вештачката интелигенција во пребарувачот Bing што донесе раст на корисниците и повисоки трошоци за рекламирање.
Капиталните трошоци во кварталот, поттикнати првенствено од напорите на компанијата да ја поддржат побарувачката за услуги за облак и вештачка интелигенција, скокнаа за 50 отсто на 14,9 милијарди долари и ги надминаа очекувањата. Пред 2020 година, Мајкрософт никогаш не потрошил толку многу на имот и опрема на годишно ниво.
Повисоки капитални инвестиции во овој квартал се почувствуваа и на полето на профитабилноста. Оперативниот профит се зголеми за 14 отсто на 30,6 милијарди долари, додека оперативната маржа падна за процентен поен на 47 отсто. Заработката по акција (EPS) се зголеми за 10 отсто на 3,30 долари, надминувајќи ги очекувањата од 3,11 долари.
Акциите на „Мајкрософт“ паднаа за 3,7 отсто на 416,4 долари во тргувањето после работното време, откако пораснаа за околу 15 отсто во 2024 година.
