Кирил Пецаков, кандидатот за градоначалник од ВМРО-ДПМНЕ за општина Охрид утрово во гостување на „Утрински брифинг“ во Слободна ТВ , истакна дека на Охрид му се потребни решавање на проблемите со УНЕСКО и заштита на езерото, чистење на депониите, решавање и средување на плажите, кои проблеми ги наметна локалната власт со плус 500-ини дивоградби, за овие четири години, но посочи дека по програмата која ја има за Охрид има мерки за 365 дена туризам во градот, субвенционирања и надвор од туристичката сезона, како и студија за потенцијалот на Охрид.
-Проблемот со УНЕСКО сами си го создадовме, имаше 500-ни дивоградби само во овие четири години, настанати врз основа на непринципиелни коалиции и непринципиелни договори во Советот на општина Охрид, но проблемот со УНЕСКО не е само за дивоградбите туку и низата забелешки за заштитата на Охридското езеро , Студенчишко блато, препораки за подигање на еколошката свест каде една од главните забелешки е депонијата во Буково, критикуваше Кирил Пецаков.
Вели дека на Охрид му е потребна регионална депонија каде што ќе се носи сметот од Охрид, но дека е потребна помош и од централната власт.
„Плажите во Охрид мора да бидат уредени и од наредното лето мора да бидат спремни за граѓаните, баналното беше во тоа што во јуни се рушеа, а во тек на туристичката сезона ги оставивме неуредени, и беа оставени со недоволни услови за граѓаните, а во август месец се објавува јавен повика за тоа како да изгледаат плажите, што е сосема нелогично“, рече Пецаков.
Посочи дека власта во последниве четири години не ги реши плажите во однос на концесионерските договори, можеше сето тоа да биде решено во септември, но беше лоша одлука на локалната власт.
„На Охрид му е потребен 365 дена туризам, ние имаме и потенцијал и можности сето тоа да го средиме, во нашата програма се предвидени мерки за зголемување на туристичката сезона како субвенционирање надвор од туристичката сезона, намалување или субвенционирање на сметките за вода, ѓубрарина на хотелите кои ќе работат и ќе понудат пониски цени, и многу други мерки, но една од најбитните е изработка на студија за туризам за да видиме какви потенцијали има градот Охрид и каков туризам можеме да развиваме во следниот период“, истакна Пецаков.
