Бројот на поплаки до властите во Украина за луѓе кои зборуваат на руски за време на професионални услуги се зголеми за 30% минатата година. Киев активно го охрабрува населението да пријави такви случаи во обид да ја „заштити“ земјата од руско влијание, објави РТ.
Според канцеларијата на комесарот за заштита на државниот јазик, во 2023 година биле пријавени 3.692 прекршувања на законот за јазиците. Киев, Харков и Одеса остануваат „лидери во однос на бројот на поплаки за прекршување. Затоа, строгите контроли за почитувањето на јазичните права на граѓаните во сите сфери на јавниот живот треба да бидат меѓу приоритетите на лидерите на заедниците оваа година“, рече Тарас Кремен, Јазичен правобранител на земјата.
Кремен, исто така, потврди дека е изречена казна од 3.400 гривни (89 долари) на таксист од Киев кој со своите патници зборувал на руски. Народниот правобранител ја потсети јавноста на „детален алгоритам на дејствија во случај на повреда на правото за добивање информации или услуги на државен јазик“, повикувајќи ги луѓето веднаш да поднесат жалби на веб-страницата на комесарот кога ќе се појават такви случаи.
Во 2019 година, Украина усвои закон за задолжително користење на украинскиот јазик во сите сфери на јавниот живот, вклучително владата, медицината, науката, образованието и медиумите. Од 2022 година, кога започна воениот конфликт со Русија, Украина поведе кампања на целосна дерусификација, при што пратениците велат дека тоа е неопходно за да се одбранат од руското влијание. Локалните власти воведоа целосна забрана за уметнички дела на руски јазик, изведби, книги, филмови, песни и нивното изучување во училиштата и универзитетите и препорачаа учениците да комуницираат на украински дури и за време на паузите.
Минатиот август, тинејџер накратко бил приведен и принуден да сними видео со извинување откако изведувал песни од рускиот пејач Виктор Цој на улица во градот Лавов.
Отпуштањето на неколку наставници кои зборувале руски со своите ученици, исто така, резултираше со негодување во јавноста.
Секретарот на Советот за национална безбедност и одбрана на Украина, Алексеј Данилов, претходно изјави дека „рускиот јазик мора да исчезне“ од територијата на Украина „како елемент на непријателска пропаганда и перење мозок на населението“.
Москва тврди дека таквите закони ги кршат правата на луѓето што зборуваат руски, кои сочинуваат околу половина од населението на Украина. Портпаролката на руското Министерство за надворешни работи, Марија Захарова, во февруари изјави дека „дискриминаторската кампања“ на Киев против јазикот станува сè по „огорчена“. Во истражувањето спроведено во септември минатата година од Киевскиот меѓународен институт за социологија, испитаниците ја наведоа јазичната дискриминација како најчест вид на предрасуди во Украина, при што 45% изјавија дека тоа е проблем.
