Натпреварите од петокот ноќта во НБА лигата ги одбележаа новите порази на Индијана Пејсерс а Феникс Санс од Јута Џез која ја продолжува победничката серија, додека Филаделфија 76ерс успеа да забележи победа.
Филаделфија 76ерс славеа на домашен терен против Мајами Хитс со 103:97. Сиксерс имаа предност од 26 поени по три четвртини благодарејќи на одличната одбрана којашто го ограничи Мајами на шут од игра на 32,8 отсто. Но тогаш Хитс ја зајакнаа својата одбрана, и во последната четвртина речиси шест минути не им дозволија на домашните да поентираат од игра и направија серија од 17:0 со што ја намалија разликата на 92:97. Сепак, Сајмонс и Ембиид во тие моменти постигнаа погодоци со што Сиксерс се одлепија на 101:92. Филаделфија сега има сооднос на победи и порази 25-24 и е осма во Источната конференција.
Бен Сајмонс беше најефикасен кај Сиксерс со 20 погодоци, а „дабл дабл“ забележаа Џоел Ембиид со 17 кошеви и 11 скокови и Дарио Шариќ со 17 поени и 10 скокови. Кај Хитс со 19 кошеви најефикасен беше Кели Олиник
Индијана Пејсерс беше поразена во Шарлот каде што домашните Хорнетс беа подобри со 133:126. Пејсерс примија 49 кошеви во првата четвртина, а по првото полувреме имаа заостанување од 18 поени, за на средина од третата четвртина да дојдат до израмнување, но ниеднаш не минаа во водство. Индијана со скор 29-24 во моментов е на седмото место во Источната конференција.
Најдобар кај Пејсерс беше Виктор Одалипо кој мечот го заврши со 35 поени, а го следеа уште неколку соиграчи со двоцифрен број поени од кои Бојан Богдановиќ постигна 18. Сепак, тоа не беше доволно да биде надиграно „динамичното дуо“ на Хорнетс во кое Кемба Вокер постигна 41 поен со 9 асистенции а Николас Батам 31 кош од кои 9 „тројки“.
Јута Џез со високи 129:99 ги совлада Феникс Санс. За Јута, со негативен скор од 23-18, ова беше четвртата победа во низа, а шеста во последните осум натпревари.
Мичел постигна 40 погодоци за Џес, додека Рики Рубио додаде 14 кошеви. Кај Санс дебитантот во НБА лигата Џош Џексон постигна 20 погодоци, додека Девин Букер уфрли 18 кошеви.
