Тимот на Портланд го повтори чудото на Орландо од отворањето на вториот натпреварувачки ден во НБА плејофот. Забележа победа над еден од најголемите фаворити за титулата, тимот на Лос Анџелес Лејкерс во првиот натпревар од Западната конференција. Портланд славеше со 100:93 и ја продолжи одличната серија од 19:1 со која и всушност се проби со разигрувањето.
Првата ѕвезда на тимот Демијан Лилард повторно белскаше на паркетот, постигна 35 поени, ја имаше вообичаената поддршка од Си Џеј Меккалум кој уфрли 22 коша, Јусуф Нуркиќ со 16 поени придонесе за победата на Портланд. На спротивната страна Леброн Џејмс постигна 23 , но недоволни за победа на „езерџиите.“
На вториот натпревар во Западната конференција немаше изненадувања. Хјустон поведе со 1:0 во победи во серијата од првото коло од плеј-офот против Оклахома. Го доби првиот меч со 123:108. Џејмс Харден постигна 37 поени. Кај Оклахома, Данило Галинари уфрли 29.
На Истокот, Мајами поведе против Индијана со 1:0, откако првиот меч го доби со 113:101. Џими Батлер со 28 и Горан Драгиќ со 24 поени беа клучни за триумфот.
