Во Хрватска е потврден првиот случај на омикрон варијантата на коронавирус, објавија во саботата тамошните медиуми повикувајќи се на здравствени извори.
Според извештаите, примерокот бил земен во приватна клиника во Загреб. Наводно бил тестиран странски работник од јужна Африка, кој бил на стручен состанок во Загреб. Информацијата ја потврдиле од Институтот „Руџер Бошковиќ“.
„Лицето кое го направило тестот изразило сомнеж за можност за зараза со нова варијанта на коронаравирусот омикрон, поради контакт со лице од Јужноафриканската Република. Примерокот е испратен на понатамошна обработка. ПЦР анализата покажа одредени отстапувања во однос на другите варијанти на корона вирусот“, пишува во соопштението.
„Целната анализа со секвенционирање на клучните региони на геномот SARS-CoV-2 покажа присуство на мутации карактеристични за новата варијанта SARS-CoV-2 омикрон. За резултатите се информирани Хрватскиот завод за јавно здравје и Министерството за здравство, па се чека нивната официјална потврда. Исто така, имајте предвид дека потребни се 72 часа за да се добие конечниот резултат на секвенционирање. Хрватскиот завод за јавно здравје навремено ќе ја информира јавноста за конечните резултати“, се додава.
