Фудбалерите на Астон Вила сосема заслужено пред своите гледачи го победија Манчестер Сити со 1:0 во 15. коло од англиската Премиер лига.
Уште една лоша и бескрвна партија одигра актуелниот англиски шампион, кој по овој пораз падна на четвртото место на табелата. Него го прескокна токму Астон Вила која има два бода повеќе од тимот на Жосеп Гвардиола. Манчестер Сити, пак, заостанува шест бода зад првопласираниот Арсенал.
Стрелец на единствениот гол на натпреварот беше Јамајканецот Леон Бејли во 74. минута.
Јунајтед, другиот клуб од Манчестер, освои три домашни бода во ова коло по победата од 2:1 во дербито против Челзи. Натпреварот не започна најдобро за Манчестер Јунајтед, бидејќи во деветтата минута Бруно Фернандеш промаши пенал. Херој на Манчестер Јунајтед, не првпат оваа сезона, беше Шкотланѓанецот Скот Мектоминај, кој двапати ја погоди противничката мрежа, во 19. и 69. минута. На другата страна единствен стрелец беше Палмер, на крајот од првиот дел за тогашното израмнување 1:1. Иако домаќинот беше подобар, Челзи можеше да грабне бод во завршниот дел од мечот, но ударот на Броја заврши во стативата.
Фудбалерите на Ливерпул тешко ги освоија очекуваните три бода на гостувањето кај Шефилд Јунајтед каде победија со 2:0. Голот кој го режираше дуелот, кај последниот тим од табелата, го постигна Вирџил ван Дијк во 37. минута кога одлично реагираше по корнер и со жесток удар ја заби топката во домашната мрежа. Во судиското надополнување, во 94. минута, овој меч го заврши Шобошлаи со гол за конечните 2:0. Со тоа Ливерпул го задржа чекорот со водечкиот Арсенал, повторно заостанување од два бода.
Убедлива победа на домашен терен оствари Фулам кој со 5:0 го победи Нотингем Форест. За гостите кобни беа Нигериецот Александар Ивоби и Мексиканецот Раул Хименез. Двајцата постигнаа по два гола, Ивоби во 30. и 73. минута и Хименез во 34. и 54. минута. Последниот гол на натпреварот го постигна Керни во 86. минута.
Втората сезонска победа на гости ја оствари Бурнмаут кој кај Кристал Палас победи со 2:0. Головите ги постигнаа Сенези во 25. и Мур во 92. минута.
Во четврток ќе играат и Евертон – Њукасл и Тотенхем – Вест Хем.Лутон – Арсенал 3-4 (Ошо 25, Адебајо 49, Баркли 57 / Мартинели 20, Габриел Хесус 45, Хаверц 60, Рајс 90+7)
