Нацрт-билатералниот протокол кој денеска пристигна во бугарското народно Собрание е документ кој дава насоки и редослед како да се спроведе Договорот за добрососедство и тој протокол нема нови барања, односно услови за Македонија.
Ова го рече премиерот Димитар Ковачевски на денешната заедничка прес-конференција со финската премиерка Сана Марин, потенцирајќи дека билатералниот протокол не претставува посебен договор или нешто ново.
– Тоа се следните чекори во однос на спроведувањето на договорот и обврските на Бугарија и Македонија. Тој протокол се потпишува на ниво на министерства за надворешни работи. Протоколот кажува до која фаза сме стигнати и што е наредно. Тоа не е нов договор во кој се додава нешто – рече Ковачевски.
За преговарачката рамка Ковачевски додаде дека треба да е мултилатерален документ за пристапување кон ЕУ како организација на држави членки, а билатералните прашања да се решаваат на билатерално ниво.
На новинарско прашање дали земјава го има променето ставот дека нема да прифати билатералните прашања да влезат во преговарчаката рамка, премиерот одговори:
– Нашиот став како Влада е дека преговарачката рамка треба да биде мултилатерален документ што содржи рамка за преговарање во однос на пристапување кон ЕУ како организација на држави членки, додека билатералните прашања треба да се решаваат на билатерално ниво со државите со коишто тие постојат. Во однос на преговарачката рамка, преговарачката рамка е мултилатерален документ што треба да биде одобрен од сите земји членки на ЕУ и којшто потоа се доставува до земјата-кандидати. Искуството е дека овој документ треба да одразува насока и правила според кои треба да се одвива процесот на преговарање, пристапување и отварање на различни поглавја како што се оди низ процесот, со цел да се усогласи државата со вклучувањето во однос на сите аспекти на ЕУ. Со оглед на тоа дека нашиот пат кон евроинтегрциите и пред НАТО интеграцијата беа исполнети со билатерални прашања, прво со прашањето со Грција за што имаме Преспански договор и имаме втор Договор што се однесува на билатерални прашања со Бугарија и којшто е потишан со цел билатералните прашања да се решат, ние сме на став како Влада дека преговарачката рамка треба да биде мултилатерален документ во којшто се разговара, и во којшто се става рамка за преговарање во однос на пристапување кон ЕУ како организација на држави членки, а додека билатералните прашања треба да се решаваат на билатерално ниво со државите со кои тие постојат – рече Ковачевски.
Тој додаде дека за решавање на билатералните прашања постојат и Договорот со Бугарија и Преспанскиот договор со Грција и изрази надеж дека ЕУ ќе усвои преговарачка рамка која што ќе отсликува мултилатерален карактер на документот.
– Од решавањето на отворените прашања коишто постојат, а тоа го покажуваат искуствата на другите држави коишто пристапувале кон ЕУ, а имале отворени билатерални прашања со држави коишто веќе биле членки во Унијата, исто така, зависи и прогресот во делот на преговорите откако тие ќе отпочнат. Така да, јас се надевам дека земјите членки на ЕУ и ние нормално како Влада дека ќе усвојат преговарачка рамка која што ќе отсликува мултилатерален карактер на документот, а додека од другата страна земјите во овој случај Република Бугарија со која што имаме билатерални отворени прашања, дека ќе биде на ниво на соседна држава која што сака да ја види другата соседна држава како полноправна членка на ЕУ, рече премиерот Димитар Ковачевски.
Во однос на протоколот од бугарското МНР, Ковачевски изјави дека тој се уште не е пристигнат во нашето МНР.
–Сите документи за коишто зборувате и за коишто се зборува во јавноста коишто се однесувааат на одлуки коишто треба да се носат во Бугарија, се наоѓаат во нивното Собрание според тоа што се гледа од медиумите. А во однос на комуникација на документи и пристигнување, бидејќи имаше таква вест којашто беше излезена дека има документ којшто дошол во МНР на РСМ, не е точно дека дошол документ, вели премиерот Ковачевски.
