Најмалку еден пациент во Обединетото Кралство починал откако се заразил со омикрон варијантата на коронавирусот, изјави во понеделникот британскиот премиер Борис Џонсон.
„За жал, потврдено е дека најмалку еден пациент починал од омикрон. Поради тоа мислам дека мораме да заборавиме на идејата дека тоа на некој начин е поблага варијанта на вирусот и да сфатиме дека брзо се шири во популацијата“, изјави Џонсон за новинарите.
Откако на 27-ми ноември беа потврдени првите случаи на зараза со омикрон сојот, владата на премиерот Џонсон воведе построги рестриктивни мерки, а во неделата тој ги повика граѓаните да ја примат и третата ткн „бусетер“ доза од вакцините против Covid-19 за да не дојде до преоптоварување на здравствениот систем.
Британскиот министер за здравство Саџид Џавид предупреди дека омикрон варијантата се шири со „неверојатна брзина“ и дека на неа во моментов отпаѓаат 40 отсто од заразените во Лондон.
