Кремљ ја прими на знаење подготвеноста на украинскиот претседател Владимир Зеленски да преговара за можно ветување за воена неутралност на Украина, но рече дека ништо не може да каже за можните преговори меѓу челниците на двете земји, а истовремено кинеската државна телевизија објави дека рускиот претседател Владимир Путин во телефонскиот разговорот со кинескиот колега Кси Џинпинг му рекол дека е подготвен да преговара со водството на Киев.
„Русија е подготвена за водење преговори со Украина на високо ниво“, изјавил Путин кого го цитира кинеското министерство за надворешно работи.
Русија е подгтовена да исправи своја делегација во Минск на разговори со Украина, изјави за новинарите портпаролот на Кремљ, Дмитриј Песков.
„Како што е познато, денеска украинскиот претседател Зеленски изјави за подготвеност да разговара за неутралниот статус на Украина. Првично, рускиот претседател Владимир Путин говореше ека целта на операцијата (воена во Украина) е да им се помогне на Луганската и Донецката народна република, вклучително и преку демилитаризација и денацификација на Украина. И тоа, всушност, е интегралната компонентна на неутралниот статус“, изјави Песков.
Според него, во таквата делегација ќе има претставници на министерствата за одбрана и за надворешни работи, како и од претседателската администрација.
Претходно украинскиот претседател Владимир Зеленски јавно му предложи на Владимир Путин директни преговори.
„Сакам уште еднаш да апелирам до претседателот на Руската Федерација (…) Ајде да седнеме на преговарачката маса за да го запреме да гинат луѓе“, изјави Зеленски.
„Ова е нова изјава. Ја примивме на знаење. Излгеда како позитивен развој на настаните“, изјави портпаролот на Кремљ, Дмитриј Песков, повикувајќи се на коментарот на Зеленски.
Песков изјви дека не може да коментира дали ќе разговараат Путин и Зеленски.
Велејќи дека Москва ќе ја проучи понудата Зеленски, Песков додаде дека очекувањата на Москва од Киев останале непроменети. Москва веќе долго бара гаранции дека Украина никогаш нема да му се придружи на НАТО или да ѝ дозволи на Алијансата да распореди сили и оружје на нејзината територија.
Претходно во петокот рускиот министер за надворешни работи Сергеј Лавров рече дека Москва ќе биде подготвена за преговори веднаш штом вооружените сили на Украина ќе го положат оружјето. Според Лавров, по народите кои живеат во Украина ќе можат „самите да ја одредат иднината без никав притисок однадвор“.
