Американскиот новинар Еван Гершкович е осуден од рускиот суд на 16 години затвор откако беше прогласен за виновен за шпионирање. Пресудата од петокот доаѓа по судењето што се одржа зад затворени врати поради прашања за „националната безбедност“.
32-годишниот репортер на „Вол Стрит Журнал“ беше уапсен во март 2023 година во Екатеринбург. Кремљ тогаш информираше дека бил „фатен на дело“.
Семејството и колегите на Гершкович ги негираат обвиненијата и тврдат дека тој наместо тоа водел обична новинарска истрага. Тогаш за првпат американски репортер беше приведен под сомнение за шпионажа по Студената војна.
Гершкович беше задржан во притвор во текот на целата истрага и судење. Според прес-службата на Регионалниот суд во Свердловск, тој на сослушувањето во петокот повторно негирал дека сторил нешто лошо.
„Гершкович Еван е прогласен за виновен и му е изречена казна затвор во траење од 16 години, за да се издржува во колонија за максимална безбедност“, рече судијата претседавач при објавувањето на пресудата, цитирана од дописникот на РИА Новости. Обвинителството претходно бараше 18 години затвор за новинарот, додека максималната казна со која се соочуваше е 20 години.
Според Роџер Карстенс, специјален претставник на американскиот претседател за заложнички работи, Вашингтон претходно се обидел да посредува во договор со Москва за ослободување на Гершкович, но досега не успеал во напорите. Сепак, рускиот министер за надворешни работи Сергеј Лавров во средата изјави дека Русија размислува за потенцијална размена на затвореници во која е вклучен и тој и дека е во контакт со американските разузнавачки агенции.
