Јужна Кореја планира да го суспендира воениот договор потпишан со Северна Кореја во 2018 година чија цел е намалување на тензиите меѓу двете земји, соопшти во понеделникот претседателскиот кабинет во Сеул, реагирајќи на балоните со ѓубре испратени од Пјонгјанг преку границата со Јужна Кореја.
Северна Кореја испратила стотици балони, според Сеул станува збор за дури 3.500 балони, носени од вертерот кои исфрлиле ѓубре на Јужна Кореја, која потегот го нарече провокација. Советот за национална безбедност во Сеул соопшти дека ќе побара одобрение од владата за суспендирање на воениот договор на состанокот во вторник.
Суспендирањето на договорот ќе ѝ овозможи на Јужна Кореја да спроведе воени вежби во близина на границата и да преземе „соодветни и итни мерки“ како одговор на провокацијата на Северна Кореја, се вели во соопштението на Советот. Не е разјаснето какви би можеле да бидат овие мерки.
Јужна Кореја претходно соопшти дека ќе преземе остри мерки против Северна Кореја поради испраќање балони за ѓубре преку границата.
Северна Кореја рече дека балоните биле одмазда за пропагандна кампања на севернокорејските дезертери и активисти на југот, кои редовно испраќаат летоци против Пјонгјанг, храна, лекови, пари и USB мемориски стикови со музички спотови и со драми преку границата. Северна Кореја реагираше луто на кампањата бидејќи е загрижена за можното психолошко влијание на материјалот и државната контрола врз јавноста, велат западните аналитичари.
