Продолжуваме со протестите и денеска низ цела Македонија и во Скопје. Ги блокираме патните правци Градско – Прилеп, патниот правец Велес – Штип, го блокираме и патниот правец Струмица – Радовиш и исто така во градот Скопје пред Владата е организиран исто едночасовен прекин на сообраќајот, изјави денеска Ѓорѓија Сајкоски, генерален секретар на ВМРО-ДПМНЕ.
„Со тоа сакаме да укажеме дека цврсто стоиме на тоа дека овој француски предлог е лош. Овој француски предлог треба да биде отфрлен од страна на Владата. И овој француски предлог е само еден нов предизвик кон патот кон ЕУ што ни носи нови и нови препреки, кои што ќе траат можеби и повеќе децении“, рече Сајкоски.
Псочои дека затоа укажуваат дека таквиот француски предлог е само стапица којашто не носи добро ништо на евроинтегративните процеси на Македонија.
„Изминатиов период, изминатите шест дена имавме протести во Скопје кои што навистина беа народни протести, протести поддржани од сите категории на граѓани, не само од ВМРО-ДПМНЕ. Денес продолживме и во цела Македонија по барање на граѓаните. Ние укажуваме дека Владата не треба да го прифати овој предлог. Но доколку го прифати францускиот предлог кој е лош, ние во Собрание нема да дозволиме да има уставни измени. Со тоа можеме да им укажеме на граѓаните дека ние нема да прифатиме уставни измени со 80 пратеници. А 80 пратеници во моментов ги нема владата“, рече Сајкоски.
Генералниот секретар на ВМРО-ДПМНЕ посочи и дека кога станува збор за насилството и она што се случуваше изминативе денови, партијата силно го осудува насилството, и како политичари кои сега го предводат ВМРО-ДПМНЕ укажуваат дека силата не е во насилството, силата е во масовноста.
„Силата е во единството на сите граѓани и силата е ако сите денеска, утре и во периодот кој следи кажеме НЕ“, појасни Сајкоски.
