Неразумна е изјавата на министерот дека ако сега се зголемат платите на работниците сега ќе има импликации на инфлацијата, велат од Сојузот на синдикати на Македонија (ССМ) откако денеска министерот за финансии Фатмир Бесими излезе со изјава дека зголемување на платите во јавниот сектор бидејќи ќе има импликации на инфлацијата и препорача тоа да се направи следната 2024 година.
„Оценката на министерот дека дијалогот во Економско-социјалниот совет (ЕСС) за зголемување на платите ќе потрае и дека побрзо ќе се утврди методологијата за плати во јавен сектор ( онаа против која се сите синдикати) со која ќе се стави ред во платите во јавниот сектор, ќе остане само негова пуста желба. До кога Владата ќе глуми социјален дијалог, до кога владините претставници ќе зборуваат едно на ЕСС, а друго по медиумите и дали некогаш ќе се засрамат за тоа што си ги зголемија платите за 78 отсто во најголемата инфлација, а со ништо не заслужија такво зголемување. Дали имаат барем трошка совест кога говорат дека ако се зголемат платите на работниците ќе се покачи инфлацијата додека над 1 100 функционери си ги полнат џебовите“, реагираат од ССМ.
Нема друга држава во Европа и во светот, додаваат од Сојузот на синдикати, во која функционерите си ги зголемиле нивните плати за 78 отсто, а единствено зголемување за работниците е само работното време и тоа за 78 отсто.
„Работниците масовно да се придружат на активностите на синдикатите во наредниот период, зошто само заедно можеме да се избориме за нашите работнички права!“, повикуваат од ССМ.
Бесими денеска изјавите на кои реагираат синдикатите, ги даде на средба со новинарите каде зборуваше и за зголемените плати на функционерите што се случи со укинување на одредба која се однесува на пресметување на коефициентите на платите. Добро е, рече тој, што Уставен го укина, а не го поништи спорниот член.
„Добро е што Уставниот суд го укина спорниот член од 2012 година за коефициентите на платите наместо да го поништи. Ако го поништеше, на функционерите ќе требаше да им се исплати застанат долг за речиси 11 години со затезни камати“, рече денеска Бесими.
Тој на средбата сподели и дека неговата плата од 71 145 денари сега е зголемена на 125 960 денари.
