Oвогодинешната програма на Mинистерството за култура е најскандалозната програма, изјави пратеничката на ВМРО-ДПМНЕ, Велика Стојкова Серафимовска во „Што не е јасно“ на Алфа телевизија.
Стојкова Серафимовска истакна дека иако насловот на конкурсот бил „Финансирање на проекти од национален интерес во културата“ сепак во Годишната програма нема национален интерес.
– Таму нема македонски автори, ниту во музичко сценска, ниту во драмска дејност, не гледаме промоција на македонската национална кутура и тоа го велам мислејќи на државната култура. Не може фестивал како што е „Денови на македонска музика“ кој е единствен за презентација на македонски композитори, да добие најмалку средства. Тоа е скандалозно, ова е единствена манифестација која промовира македонска сериозна музика – нагласи таа.
Стојкова Серафимовска посочи дека иако министерката се пофали во однос на културното наследство, сепак оваа влада на која и припаѓа на министерката не се грижи за ништо национално.
– Нема доволно средства за нематеријалното наследство, дури и прекршувања на законот за заштита на културно наследство, дадени се средства на институција која не е овластен субјект за заштита. Министерката треба да знае кои се проекти од национален интерес. Нема ниту проекти за оние добра кои се впишани во УНЕСКО и за кои државата има обврска да ги финансира. Националните институции се оштетени, а финансирани програми се финансирани само со наслови без никаква содржина, никој не знае какви се тие проекти – нагласи Стојкова Серафимовска.
