Пред самитот на лидерите на ЕУ овој викенд во Брисел, шефот на НАТО минатата недела ги повика земјите од ЕУ да не ја забораваат важноста на Турција за Алијансата и за Западот и да бараат „позитивни пристапи“.
Признавајќи го постоењето на разлики и несогласувања меѓу сојузниците, Јенс Столтенберг изјави: „Но, во исто време треба да се осигураме дека ја сфаќаме важноста на Турција како дел од НАТО и исто така како дел од западното семејство“.
„НАТО е платформа каде што можеме отворено да разговараме и кога има разлики и несогласувања меѓу сојузниците, како што гледаме, на пример, во Источниот Медитеран“, вели Столтенберг. „Истовремено, мислам дека сите треба да бараме позитивни пристапи и начини за решавање на разликите“, додаде тој.
Шефот на НАТО потсетува дека тензијата во Источниот Медитеран – која е на агендата на самитот на ЕУ – беше дискутирана и на состанокот на министрите за одбрана на НАТО минатата недела. „Се разбира, на состанокот сојузниците ја изразија својата загриженост. Во исто време, мислам дека и сите сојузници сфаќаат дека Турција е важен сојузник, бидејќи таа се граничи со Ирак и со Сирија.“
Во својот настап пред новинарите, Столтенберг изјави дека Турција е клучна земја за борбата против терористичките групи на ИСИС во Ирак и Сирија, дека е домаќин на најголемиот број бегалци во светот, а истовремено е и членка на НАТО, која претрпе најмногу терористички напади.
Тој потсети и дека работи на зајакнување и проширување на механизмот на НАТО за намалување на конфликтната затегнатост помеѓу Грција и Турција за да се спречат какви било инциденти меѓу двата сојузници во НАТО. „Верувам дека преку овие технички разговори во НАТО за деескалација на конфликти, можеме да помогнеме да се отвори патот за политички преговори, адресирајќи ги основните прашања кои се во основата на спорот.“
Во услови на неодамнешните тензии во регионот, Грција и администрацијата на кипарските Грци го зголемија притисокот врз другите членки на ЕУ да воведат санкции против Турција на самитот на лидерите на ЕУ во Брисел. Сепак, актуелниот претседавач на ЕУ, Германија, како и повеќето членки на ЕУ, не сакаа да преземат такви активности.
Турција, која има најдолго континентално крајбрежје на Источниот Медитеран, ги отфрли барањата за почитување на поморските граници на грчката администрација и на кипарските Грци, нагласувајќи дека ваквите прекумерни барања ги кршат суверените права и на Турција и на кипарските Турци.
Анкара во последните месеци испрати неколку бродови опремени за истражување на енергетски ресурси во Источниот Медитеран, потврдувајќи го полагањето на своите права во регионот, како и правата на Турската Република Северен Кипар. Турските лидери постојано нагласуваат дека Анкара е за решавање на сите отворени проблеми во регионот преку примена на меѓународното право, добрососедските односи, дијалогот и водењето преговори.
