Тајфунот Хаикуи ја погоди Кина во вторникот наутро придружен со обилни дождови и силен ветер, предизвикувајќи значителни нарушувања на југот на земјата, објавија кинеските државни медиуми.
Противпожарно возило со осум лица паднало во река во близина на метрополата Фужоу, објави во вторникот кинеската државна телевизија. Три лица се спасени, пет се водат за исчезнати, а акцијата за спасување продолжува.
Јужните кинески провинции Фуџијан и Гуангдонг беа погодени од Хаикуи, единаесеттото именувано невреме годинава, објави државната новинска агенција Ксинхуа, цитирајќи ги локалните власти.
Училиштата и градинките останаа затворени во некои области како мерка на претпазливост. Метеоролозите во Гуангдонг очекуваа дека тајфунот ќе се движи позападно над копното и ќе ослабне, објави службената новинска агенција Xinhua.
Пред да ја погоди Кина, тајфунот Хаикуи мина преку Тајван. Повеќе од сто луѓе се повредени, а околу 260.000 домаќинства останаа без струја, соопшти во понеделникот тајванскиот оперативен центар за итни случаи.
Кога невремето го мина Тајван во неделата и понеделникот, околу 8.000 жители беа принудени да ги напуштат своите домови, а 2.000 беа сместени во јавни засолништа за да се засолнат од силните ветрови и обилните врнежи.
