Сценаристот и режисер Јани Бојаџи, по синоќешната македонска премиера на неговиот дебитантски филм „Ругање со Христос“ на отворањето на 3. Меѓународен фестивал на дебитантски филм „Киненова“, ја повика Владата да го остави филмот да заработува и да се прикажува низ Македонија.
Бојаџи, на денешната прес-конференција во МКЦ, рече дека вчерашниот настан за него била совршената можност за тој и филмот да се разделат и филмот да си тргне по неговиот, а тој по својот пат.
Веќе јас не сум важен и на филмот му посакувам добра среќа и да се сретнеме сите некаде пак. Важно беше да се случи таа премиера за да се отвори таа порта и паднат сите маски. Тука јас завршувам, еве го филмот. Ако отвора општествени дискусии, мене ќе ми биде драго да се разговара, рече Бојаџи.
Крајната идеја на филмот, продолжи тој, е да се гледа во кино, но дека само Штип прифатил во понеделник да се направи премиера.
Сите други центри за култура во Македонија кои поседуваат технички можности прво прифатија, а потоа одбија да го прикажуваат со образоложение дека немаат ниту еден единствен слободен термин до крајот на годината и да им се јавам после Божик следната година, рече Бојаџи.
Нагласи дека филмот е финансиран од државата и центрите за култура се на државата, односно дека директорите на кино салоните ги именува Владата, но сега тие не му дозволуваат да се прикажува и заработува.
Филмот ќе си има фестивалски живот, но бидејќи е нискобуџетен филм со 280 илјади евра, кои се уште не се сите исплатени и имаме инспекции, а една апликација на посериозен фестивал чини 100 долари, целата моја идеја беше да дојдам до премиера, да го прикажувам и заработувам и половина од нив да потрошам на апликации, рече Бојаџи.
Филмот освои награда на фестивалот во Монтреал, каде што беше светската премиера.
Тој вчерашната акција на полицијата во која беше уапсен неговиот 74-годишен татко Андони Бојаџи од Струмица го смета како лична пресметка и притисок врз неговата работа како уметник.
Како е можно 70 годишни старци да завршат зад решетки само затоа што меѓусебно си раскажувале приказни?, прашува Бојаџи, потенцирајчи дека неговиот татко од вчера е во станица, но упте не е разговарано со него.
Според МВР, Андони Бојаџи бил еден од тројцата организатори на групата која шверцувала артефакти.
