Рускиот претседател Владимир Путин испрати денес во Атлантски Океан фрегата вооружена со хиперсонични крстосувачки проектили „циркон“. Заедно со министерот за одбрана Сергеј Шојгу и Игор Крокмал, командантот на фрегатата „Адмирал на флота на Советскиот Сојуз Горшков“, Путин на видеоконференција кажа дека бродот е вооружен со хиперсонично оружје „циркон“.
„Овој пат бродот е опремен со најновиот хиперсоничен ракетен систем „циркон“, за кој не постои еквивалент“, кажа Путин. „Ова е хиперсоничен поморски систем“.
Шојгу кажа дека фрегатата Горшков ќе плови до Атлантски и Индиски Океан и до Средоземно Море.
„Овој брод, вооружен со „циркон“, е способен да изведе прецизни и силни удари против непријателот на море и на копно“, кажа Шојгу. Ракетите летаат со брзина девет пати поголема од бризната на звукот и имаат дострел од над 1.000 километри, додаде тој.
Русија, Кина и Соединетите Американски Држави се во трка со хиперсоничното вооружување. Поради својата брзина, пет пати поголема од таа на звукот, и способноста за маневрирање, таквото оружје се смета за надмоќно против секоја противвоздушна одбрана.
