ВМРО-ДПМНЕ: Граѓаните во општина Виница најдобро знаат дека СДС единствено што знае е укинување на проекти и нудење на празни ветувања

Граѓаните во Општина Виница најдобро знаат дека СДС единствено што знае е укинување на проекти и нудење на празни ветувања, велат од ВМРО-ДПМНЕ.

СДС во Виница ветува проекти за развој на спорт и активности на младите, а од друга страна не ги решава круцијалните проблеми со кои се справува младината во општината. Кандидатот за градоначалник на ВМРО-ДПМНЕ, Мартин Павлов нуди детален урбанистички план и нови 100 локации за изградба на семејни куќи за млади брачни парови. Овие парцели ќе бидат доделени бесплатно, а младите ќе бидат ослободени од комуналии. Со ова ВМРО-ДПМНЕ ќе им излезе во директен пресрет на младите во општината, стои во реакцијата на ВМРО-ДПМНЕ и се додава:

„Ветувањето на СДС дека ќе се градат тениски и спортски игралишта е веќе започнат и реализиран проект од владата на ВМРО-ДПМНЕ. Виница доби професионален спортски терен како и е изградено повеќенаменско игралиште во село Истибања. Младите во Виница најдобро знаат дека оваа влада скрати 1.5 милијарда денари од проектите во образованието. Ваквите лаги и манипулации од СДС нема да поминат кај граѓаните во Виница бидејќи тие знаат дека ВМРО-ДПМНЕ нуди реална и отчетна програма“.