Македонската економија е пред колапс. Во услови на светска економска криза македонските граѓани се оставени на милост и немилост. Над 500 илјади граѓани во Република Македонија живеат во сиромаштија со по еден оброк во денот, а како резултат на економската состојба тие не се сигурни дека ќе го имаат и тој единствен оброк, велат во соопштението од ВМРО-ДПМНЕ.
Од оваа пратија истакнуваат дека првичните анкети велат дека над 100 илјади граѓани добиле привремен отказ, бројка која ја потсетува македонската јавност на сцените од криминалната транзиција. Потоа се нагласува дека се повторуваат и актерите.
„СДСМ е на власт, а партијата и натаму работи на задоволување на апетите на олигарсите кои своето богатство го стекнаа во овие мрачни времиња. Ниту една држава во светот не ги зголемува давачките на граѓаните, освен Македонија. Владата наместо да им помага им одмага на граѓаните. СДСМ повторно удри по џебот на граѓаните со зголемување на акцизата за горивата. Додека во светот Владите делат парична помош на секој граѓанин поединечно, Владата во Македонија гледа што повеќе да приграби од сопствениот народ“, велат од ВМРО-ДПМНЕ.
Граѓаните гледаат кој работи во нивен интерес, а кој не, нагласуваат од опозициската партија и додаваат дека се свесни оти се задоволуваат апетите на мала група олигарси и ваквото однесување на СДСМ ќе биде казнето.
