Генералниот директор на Министерството за здравство на Израел, Нахман Еш денеска изјави дека 71.593 Израелци биле позитивни на коронавирусот вчера, но изрази уверување дека многу повеќе луѓе се заразени во изминатите 24 часа – дури 200.000.
Министерството не може да достави точен извештај за бројот на новозаразени веќе трет ден бидејќи компјутерските системи се преоптоварени, јавија израелските медиуми.
– Бројките на новозаразени се огромни. Овој бран е предизвик за нас на секој чекор, во тестирањето, карантинот, компјутерските системи, болниците, бројките се огромни – изјави Еш.
Во болниците има речиси 1.600 пациенти заразени со коронавирусот од кои во тешка состојба се 526 лица.
Претставниците на Министерството за здравство, во меѓувреме, размислуваат дали да ги укинат барањата за зелен сертификат и да им дозволат на оние кои не се целосно вакцинирани да влегуваат на јавни места и да присуствуваат на настани бидејќи брзото ширење на новиот сој влијаело тој документ да застари.
