Невремето на Хималаите предизвика лизгање на земјиштето во текот на викендот, при што загинаа најмалку 41 лице, а повеќе од десетина останаа заробени или исчезнати, соопштија денеска официјални лица.
Невообичаено обилните дождови и топењето на глечерите предизвикаа неколку смртоносни поројни поплави во планинските области на Индија и соседните Пакистан и Непал во текот на изминатата година или две, при што владините претставници сѐ повеќе ги обвинуваат климатските промени.
Снимките од индиската држава Химачал Прадеш покажуваат уништени куќи, автобуси и автомобили како висат од рабовите на клисурите откако патиштата попуштиле. „Трагедија повторно го снајде Химачал Прадеш со континуирани врнежи во последните 48 часа“, напиша на X (поранешен Твитер), шефот на таа сојузна држава Сухвиндер Синг Суху.
Најмалку 41 лице загинаа од неделата, а 13 се уште се водат како исчезнати, според извештајот на државниот оддел за управување со катастрофи. Се урна храм во главниот град на Химачал Прадеш, Шимла, а спасувачите извлекле најмалку девет тела.
Индискиот метеоролошки оддел денеска издаде црвен аларм и за Химачал Прадеш и за Утараханд, предвидувајќи дека интензитетот на врнежите ќе се намали од утре. Во делови од овие сојузни држави за 24 часа наврнале дури 273 и 419 мм дожд.
