Демонстрантите, меѓу кои и сопственици на бордели и сексуални работници, демонстрираа пред шпанскиот парламент поради предлог-законот со кој корисниците на проституција и сопствениците на секс клубови или макроата, ќе бидат казнети со до четири години затвор, јавува Радио Слободна Европа.
Предлог-законот поддржан од владејачката левичарска партија ПСОЕ предлага да се прошири дефиницијата за подведување, не правејќи ја експлоатацијата на проститутка неопходна, туку само комерцијален однос. За прв пат во Шпанија, би се казнувале и клиентите, пренесува RSE.
Демонстрантите носеа маски на лицата и користеа светло црвени чадори за да го сокријат својот идентитет.
„Бараме социјалистичката партија да го повлече предлог-законот, кој подразбира вистинско укинување на проституцијата и не осудува да работиме во подземјето“, рече Сузана Пастор, претседател на Платформата против аболицијата. Таа има стан во Валенсија каде жените изнајмуваат соби за да даваат сексуални услуги.
„Денес дојдов да го заштитам мојот бизнис“, вели Сандра, самохрана мајка која е сексуална работничка веќе 12 години.
Но, новиот синдикат на сексуални работници Отрас не го поддржа протестот бидејќи го организираа сопствениците на секс клубови.
„Воопшто не се грижат за правата на сексуалните работници“, изјави за АП генералниот секретар на Отрас, Конча Борел.
Борел бара легални договори за сексуалните работници и проценува дека во Шпанија има околу 200.000 такви.
И Отрас и сопствениците на секс бизниси ги негираат официјалните владини податоци дека 90 отсто од сексуалните услуги во земјата се принудени. Полицијата соопшти дека 491 жртва на трговија со луѓе и сексуална експлоатација биле спасени во Шпанија во 2021 година.
На европско ниво, Европскиот парламент проценува дека до 180.000 жртви на трговија со луѓе се експлоатирани во проституција, а индустријата генерира 10,8 милијарди евра годишно во блокот.
Се смета дека Шпанија има една од најлесните законски рамки за проституција во Европа, казнувајќи само кога може да се докаже експлоатација или злоупотреба. Предложениот нацрт ќе ги казни и клиентите и давателите на услуги. Уште тој треба да помине низ парламентот. Шпанија, исто така, неодамна го забрани рекламирањето на проституцијата.
