Српскиот претседател Александар Вучиќ, синоќа како гостин на ТВ Хепи, во врска со просечната плата, рече дека, кога дошол на функцијата премиер, Србија делела третото и четвртото место со Македонија.
„Црна Гора беше пред нас со просечна плата од 500 евра, БиХ со 372 евра, а ние имавме просечна плата од 330 евра. Сега сме први со просечна плата од 560 евра, Црна Гора има 520 евра, БиХ 490 евра, а потоа следат Северна Македонија и Албанија“, рече тој, додавајќи:
„До крајот на годината ќе ја престигнеме Бугарија во однос на просечната плата и им ветувам на пензионерите дека ќе се обидеме да ги одржиме пензиите што е можно повисоко“.
Вучиќ рече дека Бугарија во моментов има просечна плата од 580 евра, а дека Србија ќе има просечна плата од 610 евра до крајот на годината.
Тој, исто така, им вети на пензионерите дека ќе добијат не само 20.000 еднократни надоместоци, но и дека државата ќе се обиде да ги одржи пензиите, на високо ниво како што се и платите.
