Пратеникот на ДУИ, Изет Меџити денеска ги коментираше оставките што следеа по трагедијата во Тетово. Тој вели дека кога би бил на местото на премиерот Зоран Заев, би го прифатил истите, објави ТВ 21.
„Да сум на местото на Заев, би ги прифатил оставките “, рече Меџити на настанот во основното училиште „Јашар Бег Шкупи “.
Тој додаде дека „во Собранието ќе го кажат своето мислење“ за истите, сепак додаде: „Во принцип е добро што поднесоа оставки од морален аспект. Ова покажува дека има демократски вредности и тоа се случува во демократските земји“.
Во меѓувреме, оставките сѐ уште не се поднесени до Собранието, бидејќи како што најави премиерот Заев, тие ќе бидат разгледани по епилогот од истрагата за причините за пожарот, во кој загинаа 14 лица, а 12 беа повредени во ковид центарот во Тетово вечерта на 8 септември. Министерот и заменик министерот за здравство, Венко Филипче и Илир Хасани, како и двајцата директори на тетовската клиничка болница, Флорин Бесими и Артан Етеми, поднесоа оставки во знак на морална одговорност.
