Носителот на првата изборна единица од СДСМ Никола Димитров порача дека мора да се искористи периодот пред најавите за наесен за втор бран на коронавирусот и сега да се оди на избори. Тој денеска беше на координативна средба со кандидатите за пратеници во првата изборна единица, но рече дека сѐ уште не ја почнале предизборната кампања.
– Главниот државен интерес во овој период е да бидат институциите целосно функционални, да нема дилеми околу целосно спроведување, почитување на мерките, да има Собрание и да има политички мандат за други прашања, вклучувајќи ги пристапните преговори. Тоа е важно и за политичкиот кредибилитет на владата, да креира политики, а нас не чекаат и преговори со ЕУ. Преговарачката рамка ќе биде главна водилка за сите реформи – рече Димитров.
Тој одговарајќи на новинарско прашање рече дека засега нема договор за нова лидерска средба кај претседателот Стево Пендаровски, но дека се вложуваат напори за да се дојде до консензус за датумот за избори.
