Деветгодишниот син на Србинката Маја Ш. бил сведок на крвавиот напад на плажата во Тунис. Во моментот кога почнале истрелите, малиот Вукашин пливал во морето, пишува српски „Блиц“.
Вукашин во Тунис бил на одмор со своите баба и дедо, а доцна синоќа пристигнаа на аеродромот „Никола Тесла“ во Белград. Дедото Недељко Ковачев за „Блиц“ раскажал дека тие биле сведоци на пукањето и убиството на еден од терористите.
– Престојувавме до хотелот кој беше веднаш до луксузниот комплекс и во кој загинаа сите тие луѓе. Сопругата и јас бевме на базенот покрај плажата кога почнаа првите истрели, а внукот се капеше во морето. Тоа беше околу пладне. Мислев дека се туристи што фрлаат петарди, но веднаш дотрчаа вработените од хотелот и ни рекоа да се скриеме во собите, бидејќи таму ќе сме најбезбедни, раскажува Ковачев.
Во моментот стампедо од исплашени луѓе се упатило кон хотелот, а тој во таа маса се обидувал да го пронајде внукот. Недељко не успеал да го спречи момчето да ја види крвавата сцена на плажата, иако брзо го пронашол и заминале кон нивната соба.
– За среќа, тоа ни беше последниот ден од летувањето, вели Недељко.
– Го видов терористот. Беше во бела кошула и во костим за капење. Кога почна да пука, луѓето почнаа да бегаат, па мислев дека во водата има ајкула. Тогаш видов кога полицајците го убија. Доживеав голем шок, вели деветгодишниот Вукашин.
