Се изборивме со бројните опструкции од власта, со намалените дотации и енормно високите сметки за електрична енергија. Но, тоа е нашата обврска да работиме и да изнајдеме решение за проблемите, вели градоначалникот на Општина Свети Николе во своето обраќање во кампањата „Промените на дело“ во организација на ВМРО-ДПМНЕ.
Владев изјави дека изминатата година се реализирани дури 90 проценти од планираните проекти, а се заблагодари и за идеите од страна на граѓаните потенцирајќи дека голем дел од нив се реални и ќе бидат реализирани со буџетот за 2023та година.
За една година реализиравме над 90 проценти од планираното. Асфалтиравме улици во вредност од 25 милиони денари, изградивме балон-сала која ќе им служи на најмладите во вредност од 9 милион денари, а имаме и најмодерна противпожарна станица, а набавивме и две противпожарни возила за потребите на нашите пожарникари во вредност од 120 илјади евра. Буџетот за 2023 година го правевме заедно со граѓаните, вашите идеи се преточени во проекти кои ќе се реализираат, рече тој.
Идејата на Катерина Манева ќе биде имплементирана во буџетот и реализирана во 2023 година, асфалтирање на улицата Михајло Апостолски, Гаврило Гаврилски, улицата 3 и 4 ќе бидат реализирани во 2023 година, нагласи Владев.
Воедно, Владев додаде дека 2023та година ќе биде година на инфраструктурен бум бидејќи како што рече ВМРО-ДПМНЕ е партија која секогаш работи за интересот на народот.
2023 година ќе биде година на инфраструктурен бум во Свети Николе. Ќе реализираме и асфалтираме улици, канализации во вредност од 20 милиони денари и ќе изгради нова балон-сала во СОУ Кочо Рацин во вредност од 9 милиони денари, кажа тој.
Продолжуваме со транспарентно и отчетно работење, бидејќи вие заслужувате многу подобра иднина. ВМРО-ДПМНЕ е партија која секогаш го слуша народот и работи за интересот на народот, истакна Владев.
Претседателот Христијан Мицкоски нагласи дека пристапот на ВМРО-ДПМНЕ е од народот за народот и така ќе ја води Македонија.
Нашиот пристап е од народот за народот. Така планираме да ја водиме општината. Така ВМРО-ДПМНЕ ќе ја води Македонија. И општините и државата постојат за народот. Вие сте тие кои треба да бидат во центарот на вниманието. Вашите интереси се пред се. Тоа е наш завет кон вас, вели Мицкоски.
Мицкоски рече дека граѓаните на Свети Николе ќе добијат нов парк со памтрак, справи за развивање на моторички вештини, како и ново детско катче, со комплетно осветлување и уредување со модерна урбана опрема во вредност од 7,5 милиони денари.
Свети Николе е пример како со чесно, домаќинско и посветено работење, можеме да направиме многу. Дејан реализираше над 90 процени од програмата за 2022та година, а во 2023та година Свети Николе ќе добие нов парк со памтрак, справи за развивање на моторички вештини и ново детско катче, со комплетно осветлување и уредување со модерна урбана опрема во вредност од 7,5 милиони денари. Продолжуваме заедно да градиме модерни и европски општини. И продолжуваме да создаваме иднина за сите граѓани, порача претседателот Мицкоски.
