Тројца адвокати решија да бараат целосно ослободување од казна или нејзино преполовување за осудените за настаните од 27 април 2017 година. Преку нов предлог-закон кој утре ќе го испратат во Собранието, Драган Пешевски, Јанаки Митровски и Тимовски се надеваат на поддршка од пратениците. Тие сметаат дека се случила голема неправда со петте различни квалификации на делата, но и потоа со законот за амнестија од 2018 година.
– Предлогот е да бидат ослободени сите, а на оние на кои им се изречени над 10 годишни казни затвор, да им биде намалена казната за половина, што значи повеќето ќе бидат ослободени. Ова е само предлог закон, тоа може да се доработи, да се дадат и други предлози, да бидат и целосно ослободени – вели адвокатот Пешевски.
За упадот во Собранието беа осудени 16-мина на затвор од седум до 18 години. Подоцна, со одлука на Апелациониот суд, сите добија намалување на казните од една до две години.
„Со предлог-законот за амнестија од 2018 година беше сторена голема неправда со сервирање на селективна правда преку амнестирање исклучиво на лица кои наводно сториле насилство, а всушност мотивирано од политичко-лукративни побуди. Ова ја доведе Република Македонија до состојба на неправда во која само оние кои имале можност да се испазарат не само што биле амнестирани туку и наградени додека т.н. обични смртници отслужуваат долгогодишна казна затвор“, се вели во дел од предлог-законот кој го предлагаат адвокатите Пешевски, Митровски и Тимовски.
Петнаесет од обвинетите беа амнестирани со Законот за амнестија. Обвинетите во судскиот процес за „27 април” во текот на постапката ја негираа својата вина.
