Повредените во автобуската несреќа се во добра и стабилна здравствена состојба. Првите двајца ќе бидат пуштени утре, во сабота на 27-ми ноември, други двајца на 28-ми ноември, уште двајца на 30-ти ноември и едно лице на 1-ви декември. Српскиот државјанин ќе биде пренесен во Србија, а македонските во Скопје, во организација на Министерството за здравство, соопшти министерот за надворешни работи Бујар Османи.
Како што рече Османи на прес-конференција во Владата, повредените прво ќе бидат сместени во нашите здравствени установи се додека не бидат пуштени на домашно лекување.
За преносот на посмртните останки, акциски план ќе треба да изготви Работната група што ја формира Владата и на чие чело е токму Османи.
„Владата ги презема сите трошоци за транспортот и погребот на жртвите. Нашите очекувања се наредната недела, штом заврши идентификацијата, може да се очекува вторник или среда, со можност да се помести тој ден додека не се комплтеира идентификацијата. МНР ќе го организира транспортот на посмртните останки. Денеска имавме средба со повеќе компании кои ќе бидат ангажирани околу тоа, а наредните денови планираме средба и со семејствата за да ги испочитуваме нивните барања за предавање на телата“, истакна Османи.
Подготвени сме, продолжи министерот, за сите аспекти за пренесување на повредените и на посмртните останки на настраданите.
„Продолжуваме со комуникацијата со бугарските власти. Амбасадата во Софија ќе ги преземе сите процедури за олеснување на постапката. Во наредните денови ќе информираме за точниот датум и за движењето на преносот на посмртните останки“, рече министерот.
