Против кризата со нов пакет мерки тежок 350 милиони евра

Владата на денешната седница донесе нов сет мерки за справување со енергетската и ценовната криза, вреден над 350 милиони евра. Новиот пакет мерки го образложи премиерот Димитар Ковачевски, кој рече дека со овие средства, вкупната поддршка на Владата за полесно надминување на кризата во сите сфери досега изнесува 750 милиони евра.

-Заштитата на животниот стандард на граѓаните и ликвидноста на компаниите, остануваат приоритет. Клучната порака е дека никого нема да заборавиме и да оставиме сам да се справува со последиците. Кризата ќе ја пребродиме сите заедно, рече Ковачевски на прес-конференцијата.

Тој нагласи дека мора да има енергенси, парно и струја, како и мерки за најранливите категории граѓани.

-Менаџираме добро со Буџетот и ги враќаме парите назад кај граѓаните, посебно кај најранливите категории. Направивме длабоки консултации со експертите, работодавачите, стопанските комори и пензионерите, науката, ги финализиравме мерките за поддршка на граѓаните и на компаниите, но од денес уште попосветено ќе работиме за надминување на кризата, истакна Ковачевски.

Додаде дека: „Наша обврска е да им помогнеме на граѓаните и на компаниите, разговараме отворено со стопанските комори, затоа што не е време за финансирање на профитабилност, туку на опстанок. По почетокот на војната во Украина инсистиравме на зголемување на минималната плата, на тоа се согласија и коморите, а идната година нѐ очекува ново зголемување на минималната плата и на пензиите“.

Меѓу мерките на Владата се одложување на воведувањето еколошката такса, ослободување на компаниите од плаќање ДДВ при увоз на енергенси, субвенционирање 80% од сметките за струја за домаќинстватаа, за што се одвоени 222,7 милиони евра, 17 милиони евра се издвоени за субвенционирање на придонеси во приватните компании, зголемување на пензиите…и друго.

– Јас ќе дадам сѐ од себе, јас секојдневно и активно се справувам со овие предизвици. Знам дека сите ние се грижиме за нашите семејства, но кога сте премиер, вие мора да се грижите за сите – рече Ковачевски.

Дел од мерките треба да поминат во Собрание зашто се потребни законски измени, а дел ќе бидат со одлука на Влада или на ресорно министерство.

На прашањето дали е можно Левица и ВМРО-ДПМНЕ да ги блокираат мерките, Ковачевски рече дека очекува од сите партии и пратеници да бидат одговорни пред граѓаните и стопанството.

„Левица не може да блокира, тие имаат друга агенда“, рече премиерот.

ПОВРЗАНИ НАПИСИПОВЕЌЕ ОД АВТОРОТ