Министерот за надворешни работи Никола Димитров во понеделникот и вторникот ќе престојува во работна посета на Брисел.
Како што соопшти МНР, во рамките на посетата, Димитров денеска ќе учествува на работен појадок со министрите за надворешни работи на земјите членки на Европската унија, организиран во рамките на бугарското претседателство со Советот на ЕУ, претстојното австриско претседавање и во пресрет на Советот за надворешни работи на ЕУ.
Дискусиите ќе бидат фокусирани на евроинтегративните процеси на Република Македонија, имплементацијата на реформската агенда на Владата, како и добрососедските односи.
Министерот Димитров, во вторникот на 29-ти мај, ќе има обраќање во бриселскиот тинк-тенк Европски центар за политики (ЕПЦ) на тема „The Macedonian name dispute: a test for EU enlargement to the Balkans“.
Во текот на престојот во Брисел, министерот Никола Димитров ќе оствари средби со претставници од институциите на ЕУ и неколку министри за надворешни работи на земјите членки на ЕУ.
По последната средба за името во Њујорк со шефовите на дипломатиите на Македонија и на Грција, Никола Димитров и Никос Коѕиас, медијаторот Метју Нимиц кажа дека преговорите ќе продолжат во Брисел. Од МНР засега не соопштуваат дали во Брисел ќе има средба на Димитров со Коѕиас.
