Цените на акциите пораснаа на Волстрит во понеделникот, но тргувањето беше претпазливо бидејќи по силниот скок на берзанските индекси минатата седмица, инвеститорите чекаат нови коментари од првиот човек на централната банка.
Внимателно вчера се тргуваше и на европските берзи. Лондонски FTSE индекс зајакна за 0,03 отсто, на 7.417 поени, додека франкфуртски DAX ослабе за 0,35 отсто, на 15.135 поени, а париски CAC 0,48 отсто, на 7.013 поени.
Во Њујорк, пак, индексот Dow Jones зајакна 0,10 отсто, на 34.095 поени, додека S&P 500 порасна за 0,18 отсто, на 4.365 поени, а индексот Nasdaq 0,30 отсто, на 13.518 поени.
Благодарение на уверувањето на инвеститорите дека американската централна банка го завршила циклусот на зголемувања на каматните стапки, берзанските индекси на Волстрит минатата седмиц ја забележаа најголемата неделна добивка за една година. S&P 500 скокна за 5,85 отсто, а индексот Nasdaq за 6,6 отсто, што е најмногу од ноември минатата година.
Цените на акциите силно пораснаа и на другите најголеми берзи во светот. Инвеститорите веруваат дека западните централни банки завршиле со затегнување на монетарната политика бидејќи инфлаторните притисоци постепено се намалуваат. Затоа, на пазарот сега доминираат шпекулациите за тоа кога ќе започне циклусот на намалување на каматните стапки.
Така, пазарот на пари проценува дека е 90 отсто сигурно дека американската Fed завршила со зголемувањето на каматните стапки и дека има 86 отсто шанси првото намалување на каматните стапки да следи веќе во јуни следната година. Се проценува дека Европската централна банка (ECB) би можела да почне со намалување на каматните стапки веќе во април, а британската (BoE) во август следната година.
Сепак, тоа ќе зависи од натамошниот развој на инфлацијата и економијата, а за тоа ќе разговараат челниците на Fed оваа седмица, вклучувајќи го и претседателот на централната банка Џером Пауел. Исто така, најавени се јавни настапи на повеќе функционери на ECB и британската централна банка.
Повеќе од една година, движењата на пазарот најмногу зависат од шпекулациите за тоа кога централните банки ќе го завршат циклусот на зголемување на каматните стапки и со кои каматни стапки ќе заврши тој циклус. Во иднина, пак, најмногу ќе се шпекулира на кои нивоа и во кој период ќе се намалуваат каматите.
Волстрит е поддржан и од деловните резултати на компаниите. Досега, повеќе од 400 компании од составот на индексот S&P 500 објавија деловни извештаи за третиот квартал, при што околу 82 отсто од нив оствариле поголема добивка отколку што очекуваа аналитичарите.
