Русија во саботата воведе санкции за 25 британски дипломати во потег што го опиша како одговор на казните на Велика Британија против руските официјални лица за наводни кршења на човековите права претходно оваа година.
Овој потег е последен во низата конфронтации меѓу Велика Британија и Русија, чии односи станаа сè понапнати по обидот за убиство на рускиот двоен агент Сергеј Скрипал на британско тло во 2018 година.
Во изјавата, руското Министерство за надворешни работи рече дека „како одговор на непријателските активности на британските власти и врз основа на принципот на реципроцитет, руската страна донесе одлука за воведување лични санкции против 25 британски претставници на кои не им е дозволен влез во Руската Федерација.” Москва не именуваше кои дипломати на Велика Британија ќе бидат засегнати.
Британската влада во јули објави дека забрани влез на 25 руски државјани во Велика Британија, како и замрзнување на дел од нивните меѓународни средства, во врска со смртта на Сергеј Магнитски, руски адвокат, кој почина во полициски притвор во 2009 година, откако откри корупција поврзана со неколку локални функционери на високо ниво.
Кремљ во повеќе наврати негираше какво било злосторство во случајот и го опиша одговорот на Велика Британија како обид да се меша во руските внатрешни работи.
Доминик Рааб, британскиот министер за надворешни работи, рече во јули дека одлуката за таргетирање на руските дипломати со санкции е дел од напорите на Велика Британија да ги поддржи глобалните човекови права.
