Бомбаш самоубиец се разнесе во близина на главниот шиитски храм во авганистанската престолнина Кабул во средата убивајќи притоа најмалку 26 луѓе и ранувајќи уште 18 други, соопштија властите.
Деновиве шиитските муслимани, вклучително и во Кабул, го прославуваат празникот Новруз со кој се одбележува почетокот на ткн персиска нова година.
Експлозијата се случила во кабулскиот кварт Карт-е-Сакхи, во близна на болницата „Али Абад“ и Универзитетот Кабул, потврдил портпаролот на авганистанското министерство за внатрешни работи, додавајќи дека овој храм и претходно бил цел на напади и оти се стравува дека бројот на жртвите ќе расте.
Одговорноста за нападот веднаш ја презема ултрарадикалната сунитска организација Исламаска држава, за којашто шиитите се отпадници од верата и се цел на нејзини напади ширум светот.
Последнава експлозија којашто го погоди Кабул покажува дека главниот град на Авганистан и натаму е загрозен од терористички напади и покрај ветувањата на владата дека ќе ги засили безбедносните мерки по нападот во јануари во кој беа убиени стотина луѓе.
Експлозија во средата е последната во низата насочени против шиитите во Кабул, а се случила додека верниците излегувале од храмот. Според очевидци на нападот, амбулантно возило натоварено со експлозив минало крај полициски контролен пункт во близина на канцеларијата на Високиот мировен совет и голем број странски дипломатски мисии, а потоа неговиот возач го детонирал.
Новруз е древна персиска прослава на почетокот на пролетта и се слави и во другите региони на Авганистан, но на неа се противат некои муслимански фундаменталисти кои сметаат дека е против духот на исламот.
