Во Домот на културата во Валандово во саботата од 11 часот ќе продолжи со работа 16. Конгрес на ВМРО-ДПМНЕ на кој што се очекува да биде избран новиот претседател на партијата по оставката на Никола Груевски.
Изминатата вечер на првиот ден од работата на највисокиот партиски орган присусустваа 411 од вкупно запишаните 544 делегати со што беше исполнет статутарниот услов за работа на Конгресот.
Согласно дневниот ред од 16 точки, меѓудругото треба да има обраќање претседателот во оставка Никола Груевски, а потоа ќе биде презентирана програмата на единствениот кандидат за претседател Христијан Мицковски, кој ја извршуваше функцијата генерален секретар на партијата.
За да биде избран за претседател, Мицковски треба да има мнозинство од вкупниот број делегати. Тогаш, согласно конгресната агенда, Мицкоски ќе има обраќање пред делегатите.
Синоќа, пред почетокот на конгресот, Мицковски рече дека им подава рака на неговите партиски неистомисленици, меѓу кои и Илија Димовски и Антонијо Милошевски, кои не присуствуваа на когресот, а чија иницијатива за одлагање на конгресот и бирање колективно раководство, не беше прифатена.
„Во периодот што претстои не само што има подадена рака, туку и прегратката е отворена и за сите добронамерници и граѓани на кои политките на ВМРО-ДПМНЕ им се блиски да помогнат затоа што сведоци сме последниве седум месеци е период на закани, уцени на Владата предводена од СДСМ, а мене лично ме загрижува безидејноста во насоките каде оди државата“, рече Мицковски.
Очекува лојалност од пратениците кои застанаа зад иницијативата, што, според него, е потврдено со нивното присуство на конгресот.
Претседателот во оставка, Груевски, исто пред почетокот на конгресот, кратко изјави дека, очекува транспарентен и коректен конгрес.
„Треба да се донесат мудри и рационални одлуки и потоа треба да се насочиме кон напредна и просперитетна Македонија, а предуслов за тоа е рушење на нашиот политички опонент СДСМ. Верувам дека работите ќе одат во добар правец“, рече Груевски.
Делегатите треба да го разгледаат и Извештајот за финансиско-материјалното работење во периодор од 2015 до 2017. Синоќа, зад затворени врати делегатите разговараа за актуелната состојба на ВМРО-ДПМНЕ.
